Кемколмовоце урокось

ЭРЗЯНЬ ФОЛЬКЛОРОСЬ

ЭРЗЯНСКИЙ ФОЛЬКЛОР

 

На этом уроке мы продолжим разговор об эрзянском фольклоре; закрепим названия некоторых его жанров; выучим народную песню «Ванине»; познакомимся с легендой «Литова».

1. ЮТАЗЕНТЬ КЕМЕКСТАМОСЬ

ЗАКРЕПЛЕНИЕ ПРОЙДЕННОГО

 

Эрзянь фольклор

Используя слова и их перевод из статьи о фольклоре закрепите названия видов фольклорных произведений.

Ванине (Раськень морыне)
Ванюшка (Народная песня)

Вай, Ванине, Ванине,
Сатиновой палине.
Трай-ляй-люли,
Сатиновой палине.

Турвинензэ мизолдыть,
Пильгинензэ кирнявтнить.
Трай-ляй-люли,
Пильгинензэ кирнявтнить.

Ваня – эрзянь цёрыне,
Моры мазый морыне
Трай-ляй-люли,
Моры мазый морыне.

Вай, Ванине, Ванине,
Сатиновой палине,
Тра-ляй-люли,
Сатиновой палине.

(Найдите в этой песне слова с уменьшительно-ласкательным значением, скажите, от каких слов они образованы?)

ВАЛКСКЕ:

лия лангс на других
а молиця не похожа
обуця характер
зыян беда
педиця орма заразная болезнь
ормадо менстиця умеющий лечить (лекарь)
копачазь покрыто
пель туча, облако
кивчкаемс сверкать
ёндол молния
пурьгине гром
лазомс разрубить
торо меч, сабля
цитниця блестящий
урьвакстомс жениться
панжомат ключи
ношкстамс броситься бежать
пичкась выздоровела
мизолдыця улыбающаяся
уцяскавсто счастливо
редямс заметить
нусманя печальная (-ый, -ое)
лажамо тоска
талновтомс волновать
витькстамс признаться
бажамс хотеть, стремиться
човоргадомс тронуться умом, помешаться
нежедемс прислониться
сулей тень
ёжовтомо без чувств
чумо вина

ЛИТОВА

Легенда

 

Вейке эрзянь велесэ тетянзо-аванзо марто эрясь Литова тейтересь. Сон ульнесь ялганзо лангс а молиця, мазычизэяк ульнесь та-кодамо аволь Мода лангонь. Обуцязояк ульнесь аволь весененьчарькодевикс. Паряк, секс аволь весенень вечкевиль.

Каявсь Литовань лангс покш зыян – кодамо-бути стака,асодавикс, педиця орма. Ормадо менстиця ломантне мерсть Литовань тетянстэнь ды аванстэнь ливтемс теитеренть ковгак чаво таркас – паксяс ды кадомс тозонь ськамонзо. Кадык ули истя, кода Пазось мери: эрямс Литованень эли куломс.

Ашти Литова чаво паксясонть, истя лавшомсь, мик авардемскак виезэ арась.

Апак учо менелесь чополгадсь, сонзэ копачизь тусто раужо пельть. Тусь виев пиземе. Кивчкадсь ёндол ды истя виевстэ, валдосто, теитеренть сельмензэяк мик конявсть. Модась, теке толонь торосо, кавтов лазовсь. Валдо толось теевсь мазый од цёракс. Ёндол оршазель сырнень цитниця оршамосо. Сон лоткась Литовань малас.

Мельганзо кевень кемсэнзэ марявиксстэ чийсь сыре атя – Пурьгинепазось. Окойники, сон сасызе Ёндолонь. Ваны атясь цёранзо лангс, учи, мезе тона тензэ ёвты. Чарькодсь Ёндол: икелензэ се тейтересь, конань сон умок вешни, ды ансяк сонзэ лангс мелезэ урьвакстомс.

Ёвтызе урьвакстомань мелензэ тетянстэнь – Пурьгинепазнэнь. Атянть мельскак пек тусь Литова.

Кепететсь виев варма ды кепедизе тейтеренть менель лангс.

Курок Литова пичкась, теевсь седеяк мазыекс, мизолдыцякс.

Налксесть урьвакстомань-полыямонь кой, ды кармасть одтнэ уцяскавсто эрямо.

Ютась вейке ие. Кармась Пурьгинепазось редямо: Литова пек нусмакадсь, сельмензэ авардемадо якстереть.
— Мезе теевсь, Литова? Мезе истя эйсэть талновты, урьвинем?
Витькстась Литова атявтонстэнь: каявсь оймезэнзэ истямо лажамо, кудов, мода лангс бажамо, а максы тензэ оймамо.

Пейдезевсь Пурьгинепазось:
— Мон куроксто ютавтсынь тонь стяконь мелявксот, урьвам! Вана теть панжомат минек улипаронь сисем утомтнестэ. Тосо тон курок весементь стувтсак: сайть, мезе мелезэть туи.

Ансяк а мерян теть ванномс утомонь вальматнева ды а мерян панжомс сисемеце утомонть.

Совась Литова васенце утомонтень. Тосо эрьва кодат эмежть ды фруктат. Ярсак, мезе мелеть. Ансяк тейтерентень мезеяк а эряви.

Чийсь сон вальмантень, панжизе сонзэ. Вальмава неяви Модась.

Мода лангсо сёксь: чувтнэ артозь ожо, якстере, сырнень ды тюжа тюссо… Седеяк пек ризнэзевсь Литовань седеесь.

Чийсь сон омбоце утомонтень, панжизе сонзэ, совась. Тосо сият, хрустальть, чевте ашо пух. Варштась тейтересь вальмава ды неизе Моданть. Мода лангсо моли теле. Виртне ды паксятне вельтязь сиянь ловсо, лекшесэ, сэтьместэ пры лов.

Седеяк нусмакадсь Литова. Ёртозь ёртовсь тейтересь колмоце утомонтень, панжизе сонзэ. Тантей чинеть каявсть судозонзо, ванькс кошт… Литова ковгак а ваны. Седе курок валь¬мантень. Таго неи Моданть. Тосо тундо: чудить чудикерькст, виресь копачазь валдо пиже качамосо…

Скирьк мерсь тейтеренть седеезэ, седеяк пек кармась сэредеме.

Совась Литова нилеце утомонтень. Кизэнь псисэ вастызе сонзэ те утомось, эрьва кодат цецят, кстыйть ды мастумарть…

Мезеяк а кецявты тейтеренть. Панжизе вальманть ды неизе Мода лангонь кизэнть. Ледсь мелезэнзэ, кода яксесь кудосо вирев кизна, кочксесь пангот, мастумарть. Седеяк пек ризксэсь эйсэнзэ кери.

Седе курок чийсь ветеце утомс. Сон пешксе эрямонь парьде. Парьтнесэ эрьва кодат коцт: лияназонь, мушконь, парсеень, бархатонь, парчань.

Лия горобиятнесэ эрьва кодамо тюсонь суреть, эрьгеть, горниповт, човалят. Сайть мезе мелеть, тейть эстеть сюпав оршамот. Анок теезьгак тесэ пек ламо! Ансяк Литованень мезеяк а эряви. Варштась вальмава ды неизе тиринь велест удалга чудиця леенть. Аварьгадсь.

Совась седе курок Литова котоце утомонтень. Зяро сюпавчи тесэ! Аштить покш горобият пижень, сиянь, сырнень ярмак марто. Эрьва кодат питней кевть…

Мезеяк а эряви Литованень. Варштась вальмаванть ды неизе паксянь трокс тиринь велезэст молиця кинть. Верьга вайгельть рангстазевсь тейтересь ды ёртозь ёртовсь сисемеце утомонтень. Кувать вешнесь панжома. Муизе. Совась.

Утомось чаволь. Варштась вальмава. Неизе тиринь кудонзо.

Кудо вакссо, чочко лангсо озадот тетязо ды авазо. Мартост сисем иесэ вишка цёрыне. (Эзь сода Литова: ютасть сисем иеть.)

Чийсь Литова мирдензэ ды атявтонзо ваксс, пульзясь икелест ды сельведень пачк энялды:
– Инескеть, нолдамизь монь куш вейке часос тетянь кудов!

Ваныть тетят-цёрат лангозонзо. Мезе теят? Корты Пурьгинепазось:
– Нолдатадызь, Литова, вейке часос.

Ансяк кирдть превсэть, урьвинем: кадык кияк а кутмордатанзат тосо ды кияк а моли мекев тей ильтямот.
– Паро! Паро! – пижни Литова. Сонсь капши, пурны казнеть кудов.

Кепететсь виев варма, ды вана уш тейтересь ашти тиринь кудонзо вакссо. Талнозь совась Литова кудос, шумбракстнесь. Лиссь каршонзо ялакскезэ, Ёвтась Литова тензэ, кие сон истямось. Ялакскесь толкови тензэ: тетям ды авам тусть од кудов, конань аволь умок стявтызь. Кучизе патясь ялаксонть сынст мельга, учи эйсэст, якси кудованть, кардазганть, пирева – ледстни.

Эзизь кеме цёрыненть тетясь ды авась, арсить, човоргадсть превензэ. Сась мекев ялакскесь. Ёвтнизе, кода ульнесь тевесь. Шкась Литованень кадовсь пек аламо. Стясь Литова кудонть ёжос, неждясь кеместэ ды кадызе сулейтешксэнзэ (след от тени). Путызе Литова кедьрукшнанзо вальмалангонтень, ды кадовсь чувтонть лангс кедьсулеезэ.

Ношкстась Литова ушов. Пижни ялакскензэ туртов:
— Иля яка, ялакскем ильтямон! Иля! Цёрынентень пек вечкевсь

Литова патязо, лиссь сон мельганзо, сасызе сонзэ ды кутмордызе удалдо.

Кивчкадсь ёндол, зэрькстась пурьгине , ды прась цёрынесь ёжовтомо.

Панжинзе Литова сельмензэ, ваны: сон таго менель лангсо.
— Мезекс тынь чавинк монь ялакскем, сон истямо паро ды мазый ульнесь?
— Тонсь чумат, Литова, эзимизь минек кунсоло, нусманясто мерсть Ёндол ды Пурьгинепазось.

(Переведите легенду на русский язык, расскажите её кому-нибудь из близких, не меняя имен персонажей).

Запись опубликована в рубрике Учимся говорить по-эрзянски. Добавьте в закладки постоянную ссылку.

Добавить комментарий

Ваш e-mail не будет опубликован. Обязательные поля помечены *