15 июля 2016 г. прошло заседание Исполкома Межрегиональной общественной организации мордовского (мокшанского и эрзянского) народа

0-075А.С.Пушкин лемсэ республикань Национальной библиотекасо ютась аштемтарка. Сонзэ пурнызе Эрзя-мокшонь раськень регионъютконь общественной вейсэндявксонь исполкомось. Тей сакшность исполкомонь члентнэ, республикань томбальде эрзянь ды мокшонь национально-культурной автономиянь прявттнэ.

Васняяк, исполкомонть пельде Благодарностьсэ казевсь «Мордовия» ГТРК-нь «Сияжар» редакциянь шеф-редакторонь тевень топавтыцясь Ольга Чернова «Вал уцяскав ломанде» (Н.Ф.Мокшиндэ) фильманть кисэ. МР-нь Образованиянь министерстванть пельде национальной школатнень ванстомадо ды виевгавтомадо материалонь анокстамонть кисэ казевсь корреспондентэсь Елена Полшкова.

Теде мейле промксонть ушодызе Эрзя-мокшонь раськень регионъютконь общественной вейсэндявксонь прявтось Ю.А.Мишанин. Пурнавозтненень сон пачтясь МР-нь Прявтонть В.Д.Волковонь марто вастовомадонть. Кортамось мольсь Инекужонь резолюциядонть, ванновсть образованиясо кевкстематне. МР-нь Прявтось мерсь, тиринь кельтнень эрявить ветямс республикань келес весе школатнесэ. Эряви пштистэ ваномс, кода моли ветямось, васень таркасо улезэ качествась. Истя жо кепедезель кевкстема учебниктнень коряс.

Теде башка, Прявтонть марто кортазель Эрзя-мокшонь весероссиянь кенярксчинь ютавтомась. Бажамось – улевель покшчи, кона вейсэндявлинзе минек раськетнень. В.Д.Волков шнызе те меленть. Бути весе ули парсте, сы иестэ кенярксчись ютавтови. Ю.А.Мишанин ёвтась сюкпрянь валт сеть регионтнэнень, косо истят кенярксчитнень ютавтомась теевсь паро коекс. Те: Ульяновск, Самара, Пенза, Нижней ёнкссо ды Татарстансо. Саемга, Ульяновской областьсэ ламо иень перть Кивать велесэ ютавтневи «Масторавань морот» фестивалесь, «Шумбрат» кенярксчись – Ульяновск ошсонть ды областень ламо районтнэва.

Эрзя-мокшонь раськень Регионъютконь общественной вейсэндявксонь Исполнительной комитетэнь председателесь А.С.Лузгин вастневсь МР-нь Государственной Собраниянь Председателенть В.В.Чибиркинэнь марто. Сынь кортасть народной промыслатнень ванстомадост ды сынст коряс башка программань тевс нолдамодо.

Кода ютась ковдо икеле Финнэнь-угрань раськень 7-це конгрессэсь, ёвтнесь Ю.А.Мишанин. Сонзэ валонзо коряс, тедеде тов ламо ломанть эзть яка. Сонсь промксось ютась лия форматсо. Коень коряс, ульнесть пленарной заседания ды секциява важодемат. Минек делегаттнэнь докладост тусть конгрессэнь участниктнень мельс. Пачтязель, Мордовиянь вузтнэсэ весе факультеттнэсэ иень перть кармить ветямо башка этнокурс. Васенце семестрась алтави келентень, омбоцесь – эрзянь ды мокшонь раськень историянтень ды культурантень.

Заседаниянь омбоце кевкстемась алтавсь Оренбургонь областень эрзя-мокшонь культурной центранть важодемантень. Тень коряс кортась сонзэ прявтось М.Д.Кузьмин. Михаил Дмитриевич невтсь пурнавозтнень туртов нурька фильма Оренбургонь ёнкссо эриця эрзятнеде ды мокшотнеде. Валонзо коряс, весемезэ снимазельть 6 истят фильмат ды невтезельть областень келес.

Сон истя жо ёвтнесь мокшэрзянь музейденть, кона важоди эрьва чи. Эрьва ие областень сеть районтнэсэ, косо эрить эрзят ды мокшот, ютавтовить раськень кенярксчить.

Монь койсэ, бути а ютавтомс истят кенярксчить, тевенек седеяк лавшомить. Минь ёмавтсынек морамонь ансамблянок. Коллективтне пек учить истят покшчитнень. Сынь вечкить ардтнеме морамо, ваномо лиятнень лангс, тонавтнемс лиятнень пельде. Куш васоло эрятано Мордовиядонть, минек морыцятне сакшность морамо тейгак. Коллективтнень ванстомга, эряви эрьва иестэ ютавтнемс кенярксчить, мон свал теде кортан райононь прявттнэнень, – кортась М.Д.Кузьмин.

Сон истя жо пачтясь, Оренбургонь областень ансяк 4 школатнесэ ветяви тиринь келесь уроконь лувсо. 8 школатнесэ – факультативень лувсо. Велетне чамить, эйкакштнедеяк аламо. Кинь тонавтомс? Те пек ризнэвти.

Мон сеедьстэ эрсян Бугурусланской, Северной, Абдулинской райононь эрзянь велетнесэ. Сынст школатнесэ важодить раськень музейть. Кадык сынь вишкинеть, ансяк улить! Школань библиотекатнесэ ули национальной литература, книгат, газетат ды журналт. Нама, сюкпря Мордовиянтень, кона тень коряс лезды, – ёвтнесь М.Д.Кузьмин.

Оренбург ёнксонь эрзя-мокшонь культурной куншкакурось нолдызе Екатерина Яковлева морыцянть омбоце дискензэ. Минек газетась сёрмалесь те эрзянь авадонть, кона сонсь сёрмадсь морот ды музыка. 10 иеть ютасть, кода сон тусь эрямостонть.

Промкссонть паро валсо ледстизь «Лисьмапря» Оренбург ёнксонь Бугуруслан ошонь эрзя-мокшонь общественной вейсэндявксонь прявтонть М.А.Стряпчевень лемензэ. Сон 6 иень перть ютавтни эйкакшонь фольклоронь фестивальть.

Ёвтазель мель, раськень кенярксчитнень коряс ютавтомс исполкомонь башка промкс, косо домкасто ды пштистэ ванномс весе талновтыця кевкстематнень.

Промкссонть колмоце кевкстемась алтавсь Мордовиянь государственной кельтнень ды национальной культурань элементтнэнь Саранскойсэ тевс нолдамодост. Зярс аволь весе куронь лемтне сёрмадозь колмо кельсэ. 2018 иень Футболонь коряс масторлангонь чемпионатонтень арсеви путомс эрзя-мокшонь тешкс марто брусчатка. Киланготнесэ ладявить тиринь кельсэ невтевкст (указательть). Тень коряс, келя, ламо мельть-арсемат.

Истя жо кепедезь кевкстема, мекс Саранскойсэ арась истямо тарка, косо микшневельть эрзя-мокшонь сувенирт, раськень тешкс марто эрьва кодат казнеть, эсенек артыцятнень, кедьчелькев ломантнень важодемаст. Меельце шкане пекставсть «Сюлгамо» арт-салонось, «Каргонь Ки» лавкась, косо самай микшневстькак истят ули-паротне. Микшницятнень валост коряс, сынст кедьстэ саить покш аренда. Тень коряс арсеви пшкадемс Саранск ошонь округонь Администрациянтень.

Т.МАТОРКИНА

Запись опубликована в рубрике Новости. Добавьте в закладки постоянную ссылку.

Добавить комментарий

Ваш e-mail не будет опубликован. Обязательные поля помечены *