Мордовиянь мокшавась тонафтсыне тольятти ошень эряйхнень родной кяленьконди

Березенцева (Ломачкина)Кяльсь—эрь народть питни козяшиц. И сон кармай эряма эста, кда вельденза ломаттне корхтайхть эрь шиня. Самарскяй областень Тольятти ошень Мокшэрзянь культурнай центрать мокшэрзянь культурать ванфтоманц коряс тевонзон колга газетасонк пачфнетяма сидеста. Тячи, ванат, национальнай книгань и сувениронь выставка анокласть, ванды—ульсть фестивальса, коса «Лайме порась» ансамбльсь морась мокшэрзянь морот, конатнень сяльде нолдазень башка дискс. Меля сафоль мяльс панжемс мокшень и эрзянь кяльхнень тонафнемаснон коряс питнефтома курст. Тянь вешезе сонць эряфсь, вдь Тольяттиса, кода и целайне Самарскяй областьса, аф кржа мокшеда и эрзяда. Курснень колга тевсь тусь ламотнень мяльс, но кда эрзянь кялень преподаватель мувсь эстокиге, то тя тевонди ладяй мокшень ломань савсь вешендемс цють сяда ламос.
Тяддень ноябрьста сявомок Мокшэрзянь культурнай центрать видеса мокшень кяльть кафксть недяляти вятьсы Мордовиянь Инсарскяй райононь Од Верхиссы велеса шачф-касф мокшавась Любовь Александровна Березенцева (Ломачкина).
Валонзон коряс, васенце занятияти сашендсь кефкие ломань. Ламошкасна—мокшет, но улихть и руст. Любовь Александровна содафтозень синь «Мокшэрзятнень кяльсна и культурасна» программать мархта. Сонць щафоль-каряфоль мокшавакс, мезсь нинге салазень пуромфнень мяльснон. «Содамс и шарьхкодемс эсь народцень культуранц можна аньцек эста, мзярда тонць марясак пряцень сонь аф явфтови пялькскакс, мязрда марят гордость кяльцень инкса. Мзярда бабацень или щавацень пряруцянза и нардаманза, конатнень сон сёрмадозень сюреса и ванфтозень уноконцты, арсихть тейть оцю козяшикс и шарьхкодьсак—тейть вятема тя тевть сяда тов. Кда семботь юкстамс, аф шарфнемс тянди сатомшка мяль, аф содамс юрхнень, юкстави родной кяльсь, лиякс азомс—юмай»,—азозе Л.А.Березенцева.
Мокшень кялень курсс сашенды Надежда Колчанова. Мирдец и сон—мокшет. Надежда шачсь и колмогемонь киза эрясь северса, родной кяльса корхтамс и кулемс сонь сашендовсь аф сидеста. Тяни, кле, седисон оцю кенярдема, сяс мес улихть тяфтама занятият, коза можна сашендомс иттнень мархта. Синьге кармайхть содама родной кяльснон, лама кулихть атянь-атяснон койснон-обуцяснон, эряфснон-ащефснон колга.
Кода азфоль сяда вяре, питнефтома курсне ётафневихть кафксть недяляти—шавшиста и шуваланяста и кинь мялец тонафнемс и содамс мокшень кяльть—кенкшне панжадот сембонди. Аньцек улеза мяль!
Тяни Любовь Александровна арьси сай пингонь занятиятненди платт-месть, ерай, штоба сяда лама ломань сашендоль родной кяльть коряс содамошиснон кемокстама.
Инсарскяй раойнонь Од Верхиссы велень школать аделамдонза меле, Л.А.Березенцева (Ломачкина) шумордазе М.Е.Евсевьевонь лемса Мордовскяй государственнай педагогическяй институтть филологическяй факультетонц «Рузонь кяль и литература мокшэрзянь кяльхне и литература» специальностть коряс.
Етай веконь 90-це кизотне аф теждятольхть марнек странати. Ломаттне ащесть тевфтома, теест ашельхть работама вастт. Ламотне тушендсть шири. Тяфта лиссь и Любовь Александровнань мархта. 1997 кизоня сась мокшавась Тольятти ошу, покодсь заводса, сяс мес ульсь эряма васта и заработнай платать макссезь эсь пингстонза. Савсь работамс лия вастсовок. Тяфта етасть кизот. Пингсь валом-валом полафтсь цебярь шири. Тяса-тоса ушедсь эреклафневома национальнай ширесь. Ниле кизода инголе кулемок Тольятти ошень Мокшэрзянь культурнай центрать и «Лайме порась» ансамбльть колга, мокшавась ушедсь морсема тя коллективса. Тяни нинге вяти родной кяльса занятият. Тевс нолясыне мокшень щамонзон-карямонзон, конатнень ускозень эсь велестонза, петезень-тиезень, стафтсь сапонят. Сонь козят содамошинза коеньконь-обуцяньконь, ярхцамбяленьконь, праздниконьконь колга, сяс занятияс сайхненди ули мезе кулемс и няемс.
Цёрац Иван тонафни 7 класса, шарьхкодьсы мокшень кяльть и кельгсы сонь, мирдец кирди кеме соткст «Лайме порась ансамбльть мархта.
Аф кунара Любовь Александровна сашендсь Мордовияв, ульсь шачема-касома ширеса—Од Верхиссы велеса, васьфнесь раднянзон, содафонзон мархта. Тядяц, Зоя Ивановна Ломачкина, эряфоньберьф ялга мороть мархта. Колганза аф весть тяшнефоль ламоц газетатнень эса. Улихть авторскяй моронзовок. Мазы вайгялец ётась стиренцты. Арьсетяма Л.А.Березенцевати (Ломачкинати) оцю сатфкст. Надиятама, вельденза Тольяттиса мокшень кяльть кармайхть содамонза ламотне.

Т.АЛЬШИНА.

Запись опубликована в рубрике Новости. Добавьте в закладки постоянную ссылку.

Добавить комментарий

Ваш e-mail не будет опубликован. Обязательные поля помечены *