Орозбие велесэ ютась лембе кемень фестиваль

Орданьбуень Орозбие велесэ васенцеде ютась «Орозбиень кемть» республикань промыслань васенце фестивалесь. Кадык ушосонть теле ды якшамо, тень лангс апак вано, кенярксчинтень сакшность ламо инжеть. Весе сынь пурнавкшность школа вакссо, косо анокстазель башка тарка. Ловонь пандо прясо – ловсто кевердезь покш кем – покшчинь тешксэсь! Анокстыцятнень тень кисэ ансяк шнамс эрявить. Малав весе инжетне кузнесть те кементь ваксс ды тейнесть мазый фотографият.

Те вастовомантень тердезельть сеть семиятне, косо кевердить кемть. Сынь невтнесть ды микшнесть кемест выставкасо. Кедьчелькев ломантне ней молить шканть марто вейсэ. Кевердить эрьва кодамо тюсонь кемть. Мазылгавтыть эйсэст викшневкссэ, стразасо ды лиясо мейсэ. Кода карминек содамо, сехте «моднойтне» – кавто тюсонь кемтне, саемга, кементь алксось раужо, верьксэсь кевердезь ашо понасто. А мезть кортамс, мазыйть, сельмс каявицят, лия ёнов а молицят!

Косто чачсь мелесь ютавтомс истямо фестиваль, теде ёвтни Эрзянь ды мокшонь раськень регионъютконь общественной вейсэндявксонь исполкомонь прявтось Александр Степанович Лузгин.
– Орозбие велесь содавикс Россиянь келес. Мелесь, ютавтомс кемтнень коряс кенярксчи, вельмесь умок. Монь ловоман коряс, Россиясо эрьва нилеце кемтне, конат кевердезь кедьсэ, теезь Орозбиесэ. Тесэ, вейке велесэ, сядодо ламо кемень кевердицят. Ней сынь а тукшныть, кода икелень шкане, ве ёнов, лия регионга. Сестэ сынь кавто-колмо ковс туильть важодеме лия ёнксов. 2006 иестэ школасо панжовсь кемень музей. Теде эрьва косо ёвтнинек-пачтинек. Теде мейле Орозбиев кармасть сакшномо эрьва косто сёрмат, ломантне вешсть кучомс кемть. Велень администрациясь явшесь заказтнэнь кемень кевердицятнень ланга. Сынь кевердсть кемть ды кучнесть эйсэст. Меельце кемень иетнень перть кевердезельть ды кучозельть Россиянь 56 регионов ды омбо масторов 10 500 кемть. Кемтне эзизь ёмавто эсь лезэст ды эрявиксчист. Сынст вечксызь Россиянь эрицятне, вешить ды рамсить лия масторонь ломантнеяк.

Орданьбуе ёнксонь прявтось А.Н.Антипов тешкстызе, эрзянь келень кемтнень микшнить Московонь аэропортсояк. Сындест содыть эрьва косо. Валонзо коряс, паро ули, бути кемень фестивалесь карми эрьва иень кенярксчикс. Истямо жо покшокс ды мазыекс, кодамокс кармась Орозбиесэ Троицясь.
Чувашиянь Алатырь ошонь прявтось Ю.Н.Боголюбов истя жо ёвтась лембе валт. Сон ледстнесь кода советэнь шкатнестэ Орозбиень кемтне кавксть эзть максо тензэ кельмемс. Сестэ, зярдо сон тонавтнесь Нижней Новгородсо, ков автобусось ардсь сисем част ды мейле – Северсэ армиясо служамсто.
Паро валт алтасть Орданьбуень ды Отяжбуень епископось Вениамин, Орозбие велень прявтось А.И.Аржаев, Н.П.Огарёвонь лемсэ МГУ-нь профессорось М.В.Мосин.
Инжетне тердевсть школав, косо велень мастертнэ невтсть кемень кевердемань мастер-класс. Неть цёратне ламо иень перть кевердить кемть. Сынст кедест алдо лисить алкуксонь шедеврат. Школань тонавтницятне невтсть коськстэ кевердемань мастер-класс. Тейтернетнень туртов кружоконть вети тонавтыцясь Валентина Ивановна Костина. Вейсэ сынь анокстыть понасто кевердезь картинат.
Нама, кода ютат музеенть вакска? Сон ашти школасо. Музеень покш комплексэсь зярс апак панжо, молить кортамот ды анокстамот.
Ушосонть те шкане кенярксчись мольсь эсензэ лувсо. Орозбиень, Кеченьбуень, Ташто Орданьбуень эрицятне анокстасть раськень ярсамопелень выставкат. Кинь кода, минек пек дивавтымизь кемень кондямо прякась ды сюкоротне! Сынст ичизь ды пидизь теке алкуксонь кемнеть, ансяк маштовить кургс каямскак.
Эйкакштнень туртов ютасть спортонь пелькстамот. Изницятне казевсть ламбамо казнесэ. Казевсть мастертнэяк, конат невтсть кемень кевердемань мастер-класс.
Мейле весе вейсэ мазый моро марто пурнавсть хороводс. Сцена лангсо морасть Орозбиень «Паро ялгат» ансамблясь, Орданьбуень творческой коллективтне ды Саранскоень «Мерема» фольклорно-этнографической студиясь.
Нама, те чистэнть малав весе, покштнеяк ды вишкинетнеяк (сыця инжетнеде башка), карсезельть кемсэ. Инжетне кевкстнесть: ансяк покшчинтень эли аволь тонгсть кемть? Тенст мерсть – аволь. Тельня минек эрицятне свал якить кемсэ! Кемтнень вечксызь весе. Сынь лембть, чевтть, шождат, пильгтне а кельмить ды а сизить. Бути сынст кевердизь малавиксэть – тетят эли покштят – питнепест арасть!
Кемень кевердемань промыслась те шкас ули ды эри Орозбиесэ. Велень эрицятнень туртов те эсест кшист. Сон аволь шождатнень эйстэ. Паро улевель, бути кемень кевердицятнень туртов максовольть кодамояк башка лезкс. Саемга, кедьсэ кевердезь-теезь кемтнень пачтявольть сетненень, кинень сынь алкукс эрявить ды маштовить, эли панжомс алкуксонь производства, максомс важодемань таркат.

 

Т.Маторкина

Запись опубликована в рубрике Новости. Добавьте в закладки постоянную ссылку.

Добавить комментарий

Ваш e-mail не будет опубликован. Обязательные поля помечены *